Lede In Christus Kerk het ontstaan vanuit die roeping en geloofsgehoorsaamheid van pastoor Cornelius Johannes Prinsloo en sy gade, Constance Madeline Prinsloo. Prinsloo, gebore op 1 Januarie 1900, het aanvanklik as masjinis vir die Suid-Afrikaanse Spoorweë gewerk, maar in 1923 tot bekering gekom onder die bediening van pastoor G.J. Henning van die Apostoliese Geloofsending van Suid-Afrika. In 1928 het hy begin om ‘n Pinksterbeweging in Pietersburg te lei, en later het hy by die Spade Reën Sending aangesluit, wat hom sterk beïnvloed het in sy verstaan van die werking van die Heilige Gees.

Hy het hierna ‘n gemeente in Pretoria gestig, aanvanklik in ‘n omskepte koeistal, en later in ’n gebou in Potgieterstraat. Gedurende Desember 1939 het Prinsloo, na ‘n tyd van vas en gebed, die oortuiging gekry dat hy ‘n nuwe Pinksterbeweging moes begin. Op 21 Januarie 1940 het hy, onder leiding van die Heilige Gees, die fondament gelê vir wat later “Lede In Christus Kerk” sou word. Die eerste gebou van hierdie beweging is in 1944 opgerig in Les Marais, Pretoria. Hierdie vroeë gemeente sou later as Helderberggemeente bekend staan.

Die naam “Lede in Christus” is bevestig deur ‘n profetiese openbaring, en die beweging is amptelik as “Members in Christ Assemblies of South Africa” (MICA) geregistreer op 1 November 1947. Ná verskeie pogings is die amptelike naam later suksesvol verander na Lede In Christus Kerk, wat die versameling van gemeentes beter beskryf het.